Kexverskmiðjan Esja framleiddi fyrr á árum mjög vinsælt vanillukex, en þáverandi forstjóri var Sæmundur Ólafsson. Umrætt kex var formlega nefnt í höfuðið á honum, Sæmundur, og gekk í daglegu tali undir því nafni. Þegar Esja sameinast Frón árið 1970 heldur þessi venja áfram. Kremkexið frá Frón fær þetta sama Sæmundar-viðurnefni og sparifötunum bætt við í ljósi þess að kremkex er kannski aðeins meira spari en gamla vanillukexið - sem sagt Sæmundur í sparifötunum.

Kex var upphaflega selt í lausasölu, geymt í tré- eða blikkkössum. Fyrstu tegundirnar voru kringlótt matarkex, en fljótlega bættust við ferkantað mjólkurkex og kremkex. Eftir stríð komu síðan nýjar tegundir, meðal annars súkkulaðihúðað kex. Með tímanum þróuðust umbúðirnar og lausasalan vék fyrir nútímalegri og vandaðri pakkningum.